شیوسینا کے رہنما ایکناتھ شنڈے نے مہاراشٹر کے وزیر اعلیٰ کے عہدے سے استعفیٰ دے دیا ہے۔ حالیہ دنوں میں اسمبلی انتخابات کے نتائج آنے کے بعد وہ راج بھون گئے اور گورنر سی پی رادھا کرشنن کو اپنا استعفیٰ پیش کیا۔ گورنر نے انہیں نئے انتظامات ہونے تک کارگذاروزیراعلیٰ کی حیثیت کا م کرنے کو کہا ہے۔ آج ریاستی اسمبلی کی میعاد ختم ہو رہی ہے۔
شنڈے اپنے دو نائب وزرائے اعلیٰ دیویندر فڑنویس اور اجیت پوار کے ساتھ راج بھون پہنچے اور اپنا استعفیٰ پیش کیا۔ ریاست میں ہوئے اسمبلی انتخابات میں مہاوتی اتحاد کو شاندار جیت ملی ہے۔ اب یہ اتحاد جلد ہی نئی حکومت بنانے کا دعویٰ پیش کرنے کا امکان ہے۔ 288 رکنی اسمبلی میں مہاوتی کو 232 سیٹیں ملی ہیں۔
جلد ہی مہاوتی کی طرف قانون ساز پارٹی کے لیڈر کا انتخاب کیا جائے گا۔ بی جے پی کے دیویندر فڑنویس اس دوڑ میں آگے بتائے جا رہے ہیں۔ تاہم، ایکناتھ شنڈے نے ابھی تک وزیراعلیٰ کے عہدے کے لیے اپنا دعویٰ ترک نہیں کیا ہے۔ لیکن بی جے پی سب سے بڑی پارٹی کے طور پر ابھرنے کے بعد امید کی جا رہی ہے کہ وہ اس بار وزیر اعلیٰ کے عہدے پر کوئی سمجھوتہ نہیں کرے گی۔
ریاستی اسمبلی کی مدت آج ختم ہو رہی ہے۔ ایسے میں آج شام تک نئی حکومت بنانا ضروری ہے۔ توقع ہے کہ شام تک اتحاد کی طرف سے قانون ساز پارٹی کے سربراہ کا انتخاب کر لیا جائے گا۔
اس کے بعد دیر شام تک حلف برداری ہو سکتی ہے۔ آپ کو بتا دیں کہ منگل کو بی جے پی لیجسلیچر پارٹی کے لیڈر کا انتخاب کیا جائے گا۔ اس کے لیے منعقد کی گئی میٹنگ میں مرکزی وزیر داخلہ امت شاہ بھی شرکت کریں گے۔ ملاقات کے بعد شاہ وزیر اعلیٰ کے نام کا اعلان کریں گے۔
