عوام مہنگا گوشت نہ خریدیں ، یا گوشت کا استعمال کم کردیں
مالیگاوں میں ایک بار پھر غریب عوام کے زخموں پر نمک چھڑکا جا رہا ہے۔ عید قربان سے پہلے گوشت کے داموں میں ہے رحمانہ اور بے تحاشہ اضافہ کر دیا گیا ہے۔ سننے میں آرہا ہے کہ ایک بڑی گوشت کمپنی جانوروں کا فی کلو 315 روپے کا بھاؤ دے رہی ہے، جس کی وجہ سے عام ٹھیلہ گاڑیوں پر گوشت 280 سے 340 روپے فی کلو تک پہنچ چکا ہے۔
مالیگاوں غریب مزدوروں کا شہر ہے۔ یہاں کے لوگ دو وقت کی روٹی کے لیے جدوجہد کرتے ہیں، اور اب گوشت تو ان کے لیے خواب بنتا جا رہا ہے۔
پچھلے الیکشن میں گوشت کے دام کم کرنے کے جھوٹے وعدوں اور واویلا کرنے والے لیڈران آج بالکل خاموش ہیں۔ کوئی ایک بھی عوام کے حق میں منہ کھولنے کو تیار نہیں۔ الٹا گوشت کمپنی نے مقامی قریش برادری کے ہزاروں غریب مزدوروں کو بے روزگار کر دیا ہے۔ کمپنی باہر کے مزدوروں کو نوکریاں دے رہی ہے جبکہ مقامی لوگوں کا خون پسینہ کا ایک پیسہ بھی نہیں مل رہا ہے۔ مقامی مزدوروں کا دن رات استحصال کیا جا رہا ہے۔
اب صورتحال یہ ہے کہ گوشت مہنگا ہونے کے ساتھ ساتھ جانور بھی تیزی سے مہنگے ہو رہے ہیں۔ اگر یہی لوٹ مار جاری رہی تو اس سال غریب اور متوسط طبقہ کے لیے قربانی کرنا ناممکن ہو جائے گا۔امیر لوگ تو آرام سے جانور خرید سکتے ھيں لیکن عام آدمی کو قربانی کے لیے قرض لینا پڑے گا یا پھر شرمندگی سے دیکھتے رہنا پڑے گا
ہم سیاسی لیڈران اور انتظامیہ سے سیدھا سوال کرتے ہیں:
کیا آپ غریبوں کا خون چوسنے والی اس کمپنی کے سامنے گھٹنے ٹیکنے والے ہیں؟
کیا آپ مقامی مزدوروں کی بے روزگاری اور استحصال کو دیکھ کر بھی آنکھیں بند کیے رکھیں گے؟
اب وقت آ گیا ہے کہ فوری طور پر سخت اقدامات کیے جائیں۔ گوشت اور جانوروں کے بڑھتے دام روکے جائیں، مقامی قریش برادری کے مزدوروں کو ان کا حق دیا جائے اور کمپنی کے غیر منصفانہ طریقوں پر لگام لگائی جائے۔
بصورت دیگر عوام اب صبر کی آخری حد پر پہنچ چکی ہے۔ اگر فوری طور پر کوئی ٹھوس لائحہ عمل نہیں بنایا گیا تو زبردست عوامی تحریک اور شدید احتجاج کا سامنا کرنے کے لیے تیار رہیں۔ ہم شہر کی عوام سے بھی گزارش کرتے ہیں کہ مہنگا گوشت نہ خریدیں یا پھر گوشت کا استعمال کم کردیں ہم ایک دو مہینہ گوشت نہیں کھائیں گے تو کیا بگڑ جائے گا اس لئے ہوشمندی کا مظاہرہ کرتے ہوئے بیدار رہیں۔
*محسن کرانہ والا*
وارڈ نمبر 3، مالیگاوں
