ممبئی: دیویندر فڑنویس مہاراشٹر کے نئے وزیر اعلیٰ ہوں گے۔ مہاراشٹر کے وزیر اعلی پر 12 دن کا سسپنس اب ختم ہو گیا ہے۔ بی جے پی لیجسلیچر پارٹی میٹنگ میں دیویندر فڑنویس کے نام پر مہر لگ گئی۔ اس کے بعد دیویندر فڑنویس، ایکناتھ شندے اور اجیت پوار ایک ساتھ ایک ہی کار میں راج بھون پہنچے ۔ یہاں انہوں نے گورنر رادھا کرشنن کے سامنے حکومت سازی کا دعوی پیش کیا ۔ اس موقع پر مبصر نرملا سیتارمن بھی موجود تھیں ۔
بتادیں کہ مہاراشٹر بی جے پی لیجسلیچر پارٹی کی میٹنگ بدھ کو ممبئی میں ہوئی۔ اس میٹنگ میں دیویندر فڑنویس کو متفقہ طور پر قانون ساز پارٹی کا لیڈر منتخب کیا گیا۔ اس طرح دیویندر فڑنویس کے وزیر اعلیٰ بننے کا راستہ صاف ہو گیا۔ بی جے پی کی مرکزی قیادت نے مرکزی وزرائے خزانہ نرملا سیتارامن اور وجے روپانی کو بطور مبصر بھیجا تھا۔ دیویندر فڑنویس کو ان کی موجودگی میں قانون ساز پارٹی کا لیڈر منتخب کیا گیا۔لیجسلیچر پارٹی میٹنگ میں چندرکانت پاٹل اور سدھیر منگنٹیوار نے دیویندر فڑنویس کے نام کی تجویز پیش کی۔ پنکجا منڈے نے اس کی حمایت کی۔
قانون ساز پارٹی کا لیڈر منتخب ہونے کے بعد نرملا سیتارامن اور وجے روپانی نے دیویندر فڑنویس کو گلدستہ دے کر مبارکباد دی۔ دیویندر فڑنویس کو اسمبلی انتخابات کے 11 دن بعد قانون ساز پارٹی کا لیڈر منتخب کیا گیا ہے۔ دراصل مہاراشٹرا اسمبلی انتخابات کے مکمل ہونے کے بعد وزیراعلیٰ کے لیے دو ناموں کو لے کر بحث عروج پر تھی۔ ان میں پہلا دیویندر فڑنویس کا تھا اور دوسرا ایکناتھ شندے کا۔ اب لیجسلیچر پارٹی کے لیڈر کے طور پر دیویندر فڑنویس کے نام کو منظوری دے دی گئی ہے۔
حلف برداری 5 دسمبر کو آزاد میدان میں ہوگی۔ تاہم دیویندر فڑنویس کے ساتھ کتنے وزراء حلف اٹھائیں گے یا نہیں، اس حوالے سے ابھی تک صورتحال واضح نہیں ہے۔
