“جب بھوک نے معصوم کا مستقبل بیچ دیا:
اقتدار کی کوتاہیوں کا سیاہ آئینہ”
✍️*وسیم رضا خان*✍️
⏺️⏺️
انسانی تہذیب کا سب سے بنیادی فریضہ یہ ہے کہ ہر شخص کو خوراک، تحفظ اور عزت ملے۔ یہ کسی بھی ملک کی حکومت کی پہلی اور سب سے مقدس ذمہ داری ہوتی ہے۔ لیکن جب ایک معاشرہ اس مقام پر پہنچ جائے کہ محرومی کی مار جھیلنے والے والدین اپنے ہی بچے کو کھانے کے بدلے بیچنے پر مجبور ہو جائیں، تو یہ صرف ایک خاندان کی المیہ کہانی نہیں رہتی بلکہ حکومتی نظام کی سنگین ناکامی کا ثبوت بن جاتی ہے۔
مہاراشٹر کے تریمبکیشور جیسے روحانی اور ثقافتی طور پر زرخیز علاقے سے سامنے آنے والے اس واقعے نے پورے ملک کو ہلا کر رکھ دیا ہے۔ 14 بچوں والا ایک جوڑا، جسے غربت، بے روزگاری اور غذا کی کمی نے جکڑ رکھا تھا، اپنی مجبوری میں اپنے ہی بچے کو بیچنے پر مجبور ہوگیا۔ یہ صرف ایک “خبر” نہیں بلکہ انتظامیہ کی بے حسی کا خوفناک نشان ہے۔
حکومت کس منہ سے ترقی کی بات کرتی ہے، جب بھوک اور بے بسی ایک معصوم کے مستقبل کی قیمت طے کر رہی ہو؟ یہ کیسا فلاحی ریاست کا تصور ہے، جہاں ایک معمولی سے سروے کے دوران ایسی دل دہلا دینے والی حقیقت سامنے آئے اور پھر بھی نظام اپنی ناکامی سے نظریں چرا لے؟ تحقیق یہ بھی جاری ہے کہ کہیں یہ جوڑا صرف روزگار کے حصول کے لیے تو مسلسل بچے پیدا نہیں کر رہا تھا؟ اگر انسان ہر طرف سے روزگار حاصل کرنے میں ناکام رہے اور دو وقت کی روٹی کے لیے ترستا رہے تو وہ کسی بھی طرح کے جرم کے بارے میں سوچ سکتا ہے۔ یقیناً ایسا کرنا جرم ہے، لیکن حکومت اور انتظامیہ کو اس کا ذمہ دار اس لیے ٹھہرایا جا سکتا ہے کہ انہوں نے لوگوں کو اس حد تک مجبور ہونے دیا کہ وہ جینے کے لیے ایسے راستے تلاش کریں۔ یہ واقعہ ہمیں بتاتا ہے کہ کاغذوں پر چلنے والی اسکیموں اور زمین پر جینے والے لوگوں کی زندگی میں کتنا گہرا فرق ہے۔ سماجی تحفظ کی اسکیمیں، غذائیت کے پروگرام، روزگار مشن—ان کی حقیقت تب ہی معنی رکھتی ہے جب یہ بھوک سے لڑتے ہوئے عوام تک پہنچیں، ورنہ یہ صرف تقریروں کی رونق بڑھانے والے کھوکھلے وعدے بن کر رہ جاتے ہیں۔ حکومت کو سمجھنا ہوگا کہ غربت صرف اعداد و شمار کا کھیل نہیں بلکہ لاکھوں حقیقی چہروں کی کڑوی حقیقت ہے۔ ٹنوں “ڈیٹا” کسی ایک چھوٹے بچے کی آنکھوں میں بسی بھوک کو چھپا نہیں سکتا، نہ ہی انتظامی بے حسی کو معاف کر سکتا ہے۔ یہ واقعہ ہمیں آئینہ دکھاتا ہے—ایسا آئینہ جس میں ترقی کے دعوؤں کی چمک نہیں بلکہ نظر انداز کیے گئے شہریوں کے آنسو دکھائی دیتے ہیں۔ ایسی کوئی بھی مجبوری کسی بھی انتظامیہ پر گہرا داغ ہے۔ اور جب تک نظام ان زخموں کو بھرنے کی سچی کوشش نہیں کرے گا، تب تک ترقی صرف ایک کھوکھلا خواب بنی رہے گی۔ آج ضرورت ہے حساس پالیسی سازی کی، جوابدہی کی، اور سب سے بڑھ کر انسانوں کی زندگی کو اولین ترجیح دینے کی۔ کیونکہ جب کوئی ملک اپنے سب سے نازک اور کمزور شہریوں کی حفاظت نہیں کر پاتا، تو کوئی بھی کامیابی اس کی ناکامی سے بڑی نہیں ہو سکتی۔
کل ضلع ناسک میں اعجاز صدیقی، عبدالعظیم فلاحی و رضوان ربانی صاحبان کو قومی ہم آہنگی "مثالی مدرس ایوارڈ 2025"
بھاؤنا بہودیشیہ سنستھا (رجسٹرڈ سماجی و ادبی تنظیم) ضلع ناسک کے زیراہتمام ایک پر وقار اعزازی تقریب میں مالیگاؤں سے اعجاز صدیقی (جمہور) عبدالعظیم فلاحی (جامعۃ الہدی) و رضوان ربانی (سردار) صاحبان کو "قومی ہم آہنگی مثالی مدرس ایوارڈ 2025" تفویض کیا جائے گا- بھاؤنا بہودیشیہ سنستھا ایک کثیرالمقاصد رجسٹرڈ سماجی و ادبی تنظیم ہے جو علمی، ادبی، فلاحی، سماجی و تعلیمی خدمات پیش کرنے والوں کو اعزاز سے نوازتی ہے باعثِ مسرت ہے کہ شہر عزیز مالیگاؤں سے قومی ہم آہنگی مثالی مدرس ایوارڈ 2025 مذکورہ تینوں صاحبان کو پیش کیا جائے گا یہ اعزازی تقریب پردھان ساہتیہ سنگھ کے زیرِ اہتمام منعقد کی جا رہی ہے۔ جس میں مہمانانِ خصوصی: محترمہ ڈاکٹر بھارتی تائی پاٹل(مرکزی وزیر، حکومتِ ہند)محترم شری رمیش چودھری(کاروباری، ناسک)محترمہ سونالی رمیش چودھری(صدر، ساوتری بائی پھولے منڈل، ناسک)محترم رشید انور عبدل(صدر، آل انڈیا ٹیچرس ایسوسی ایشن)محترم شیلشیخند رائیکر(سینئر صحافی و ادیب، گوا)محترم شیواجی راو شیراڈ(صدر، ہیڈ ماسٹرز سنگھ، ناسک)محترم بی۔ جی۔ چودھری(صدر، تلی سماج، ناسک) اور خصوصی مدعوین میں مہیش مُلے
(سیکریٹری، بھاؤنا کثیرالمقاصد ادارہ)بھارت دیورے(صدر، بھاؤنا کثیرالمقاصد ادارہ)بھاؤ صاحب بابا(رکن، بھاؤنا کثیر المقاصد ادارہ)رمیش چندر کوہلی(ناسک) صاحبان ہوں گے یہ تقریب اعتراف خدمات بروز اتوار، 14 دسمبر 2025 کی صبح 11:00 بجےبمقام:انڈین میڈیکل ایسوسی ایشن ہال (IMA Hall)شیوسینا مرکزی دفتر کے سامنے، شالیمار چوک، ناسک میں منعقد ہے
