پاکستان فیکٹری دھماکہ: مرنے والوں کی تعداد 20 ہو گئی، فیکٹری مالک گرفتار، دیگر کی تلاش جاری
فیصل آباد (پاکستان): پاکستان کے شہر فیصل آباد میں گلو فیکٹری میں گیس لیکج کے باعث سٹیمر میں زوردار دھماکے کی وجہ سے ایک ہی خاندان کے سات افراد سمیت 20 لوگ ہلاک اور سات زخمی ہو گئے۔
کرسٹل کیمیکل فیکٹری میں ہونے والے دھماکے سے ملک پور علاقے میں چار قریبی صنعتی یونٹ اور نو مکانات بھی تباہ ہو گئے۔ ریسکیو ٹیموں اور پولیس نے زخمیوں کو الائیڈ ہسپتال کے برن یونٹ میں داخل کرایا جن میں سے تین کی حالت تشویشناک ہے۔ حکام نے ڈان اخبار کو بتایا کہ مرنے والوں کی عمریں ایک سے 62 سال کے درمیان تھیں۔
کرائم سین ٹیموں اور فرانزک ماہرین نے جائے وقوع کا معائنہ کیا جب کہ فیکٹری کے مالک قیصر چغتائی اور انتظامی عملہ مبینہ طور پر کئی گھنٹے تک چھپے رہے۔ وزیر اعلیٰ پنجاب مریم نواز شریف نے ہلاکتوں پر دکھ کا اظہار کرتے ہوئے متاثرہ خاندانوں سے اظہار تعزیت کیا۔ انہوں نے کمشنر راجہ جہانگیر انور سے تفصیلی رپورٹ بھی طلب کی۔ کمشنر نے بعد ازاں اس مہلک واقعے کی ذمہ داری کا تعین کرنے کے لیے پانچ رکنی کمیٹی تشکیل دی۔
لیبر باڈیز نے بھی حکام کو تنقید کا نشانہ بنایا۔ ڈان کی ایک رپورٹ کے مطابق نیشنل ٹریڈ یونین فیڈریشن کے سیکرٹری جنرل ناصر منصور، لیبر قومی موومنٹ کے چیئرمین بابا لطیف انصاری اور حقِ خلق پارٹی کے سربراہ فاروق طارق نے الگ الگ بیانات میں بڑے پیمانے پر جانی و مالی نقصان کے لیے حکومت کی لاپرواہی کو ذمہ دار ٹھہرایا۔ان کا کہنا تھا کہ حفاظتی اقدامات کو نافذ کرنے میں حکومت کی ناکامی نے فیکٹری مالکان کو ایسے حالات میں کام کرنے کی اجازت ملی جس سے مزدوروں اور رہائشیوں کو خطرہ لاحق تھا۔
اس کے بعد پولیس نے فیکٹری مالک کو گرفتار کر کے انسداد دہشت گردی ایکٹ، پاکستان پینل کوڈ اور دھماکہ خیز مواد ایکٹ کی متعدد دفعات کے تحت مقدمہ درج کر لیا۔ پولیس کے مطابق ایف آئی آر میں قیصر چغتائی، منیجر بلال علی عمران اور دیگر چھ افراد کو نامزد کیا گیا ہے۔
منیجر بلال علی عمران، باورچی خالد اور ورکرز زین اور عطا محمد کو بھی حراست میں لے لیا گیا ہے۔ ایف آئی آر میں کہا گیا ہے کہ رہائشیوں نے بار بار انتظامیہ کو احاطے میں خطرناک، آتش گیر کیمیکل ذخیرہ کرنے کے خلاف خبردار کیا، لیکن ان انتباہات کو نظر انداز کر دیا گیا۔
ڈان نے رپورٹ کیا کہ دھماکے کی وجہ سے ایک گلو یونٹ سمیت چار فیکٹریوں کی چھتیں اور قریبی شہاب ٹاؤن میں نو مکانات منہدم ہو گئے۔ پولیس نے حادثے میں 20 افراد کے ہلاک اور سات دیگر زخمی ہونے کی تصدیق کی ہے۔
مرنے والوں میں ایک ہی خاندان کے سات افراد شامل
62 سالہ شفیق، ان کی اہلیہ 55 سالہ مقصودہ، ان کا بیٹا عرفان، اور پوتے 13 سالہ مقدّس، 12 سالہ ریحان، 10 سالہ محمد احمد اور 4 سالہ اذان ہلاک شدگان میں شامل ہیں۔
مکان گرنے سے الیکٹریکل انجینئر عاشق حسین اور ان کے تین بیٹے 24 سالہ عبید، 22 سالہ عمر اور 20 سالہ بلال جاں بحق ہوگئے۔ اس کے علاوہ ایک اور خاندان کے چار افراد 40 سالہ فاخرہ، اس کا ایک سالہ بیٹا علی حسنین، اور بیٹیاں ماہم، 4 اور جنت بھی ملبے تلے دب کر جاں بحق ہو گئیں۔ مرنے والوں میں دو بھائی 25 سالہ وقاص اور 23 سالہ سام بھی شامل ہیں جو قریبی کڑھائی کے کارخانے میں کام کرتے تھے۔ ڈان کے مطابق، فضل نام کا فیکٹری ورکر بھی جاں بحق ہو گیا۔
اگر روزانہ ایک ماہ تک لگاتار گرین ٹی پی جائے تو کیا ہوگا؟
اگر آپ مسلسل ایک ماہ تک گرین ٹی پی جائے تو یہ معمولی سی عادت جسم میں اندرونی سطح پر مثبت تبدیلیاں پیدا کرسکتی ہے۔
ماہرین کے مطابق اس مشروب کے فائدے آہستہ آہستہ ظاہر ہوتے ہیں لیکن اثر دیرپا اور مفید ہوتا ہے۔آپ کو صحت کے چند ان فوائد کے بارے میں بتاتے ہیں جو 30 روز تک گرین ٹی پی کر حاصل کیے جا سکتے ہیں۔
میٹابولزم میں بہتری
این ڈی ٹی وی میں شائع ہونے والی ایک رپورٹ کے مطابق گرین ٹی کا استعمال جسم میں چربی جلانے اور توانائی پیدا کرنے کے عمل کو تیز کرتا ہے۔
ایک ماہ کے استعمال کے بعد عام طور پر توانائی میں واضح اضافہ محسوس ہوتا ہے۔ ہاضمہ بہتر ہوتا ہے، کھانا جلد ہضم ہونے لگتا ہے، پیٹ کی سوجن اور بوجھل پن میں کمی محسوس ہوتی ہے اور وزن کم کرنے والے افراد کو باقاعدگی اور بہتر رفتار محسوس ہوتی ہے۔
جلد پر اثرات
گرین ٹی میں پائے جانے والے طاقتور اینٹی آکسیڈنٹس جلد کی سوزش اور نقصان کم کرتے ہیں۔
ایک ماہ تک گرین ٹی کے استعمال کے بعد اکثر لوگوں کی جلد پر دانوں اور سرخی میں واضح کمی ہو سکتی ہے۔ جلد زیادہ صاف رنگت شفاف محسوس ہوتی ہے جبکہ سوزش کم ہونے کی وجہ سے چہرہ تازہ دکھنے لگتا ہے۔
گرین ٹی میں موجود ایل تھیانین اور ہلکی کیفین دماغ کو پرسکون رکھتے ہیں۔ایک مہینے تک روزانہ استعمال سے پڑھائی اور دفتر کے کام میں توجہ بڑھتی ہے، ذہنی تھکاوٹ کم ہوتی ہے، موڈ بہتر ہوتا ہے اور سوچنے اور یاد رکھنے کی صلاحیت میں بہتری محسوس ہوتی ہے۔
آنتوں اور ہاضمے کی صحت بہتر ہوتی ہے
گرین ٹی قدرتی پری بائیوٹک کا کردار ادا کرتی ہے اور جسم میں صحت مند بیکٹیریا بڑھاتی ہے۔
ایک ماہ میں ہاضمے میں بہتری آتی ہے، گیس اور پیٹ پھولنے کی شکایت کم ہوتی ہے، کھانے کے بعد بوجھل پن نہیں رہتا اور آنتوں کی صحت بہتر ہونے سے مدافعتی نظام بھی مضبوط ہوتا ہے۔
دل کی صحت پر مثبت اثرات
گرین ٹی کے قدرتی اجزا خون کی شریانوں کی حفاظت کرتے ہیں اور دل کے نظام پر اچھا اثر ڈالتے ہیں۔اسے روزانہ پینے سے ایل ڈی ایل یعنی خراب کولیسٹرول میں کمی آنے کی توقع ہوتی ہے، بلڈ پریشر زیادہ متوازن رہتا ہے، خون کی گردش بہتر ہوتی ہے اور لمبے عرصے میں دل کی بیماریوں کے خطرات کم ہو سکتے ہیں۔
تناؤ اور بے چینی میں کمی
تحقیقات کے مطابق گرین ٹی تناؤ بڑھانے والے ہارمون کو کم کرتی ہے۔ اس کے روازنہ استعمال نیند کے معیار میں بہتری آ سکتی ہے، بے چینی اور چڑچڑے پن میں کمی محسوس ہوتی ہے، روزمرہ زندگی میں جذباتی استحکام بڑھتا ہے اور ذہن زیادہ پرسکون رہتا ہے۔
وشنو دیوی میڈیکل کالج میں مسلم طلبہ کے داخلے پرRSS اور ہندو تنظیموں کا احتجاج ۔۔۔ مسلم طلبہ کے ایڈمیشن منسوخ کرنے کامطالبہ
وشنو دیوی میڈیکل کالج میں مسلم طلباء کے داخلے کے خلاف ہندو تنظیموں کا احتجاج
راشٹریہ سویم سیوک سنگھ (آر ایس ایس) سے وابستہ تنظیموں نے جموں خطے میں احتجاج شروع کیا ہے، اور مطالبہ کیا ہے کہ شری ماتا ویشنودیوی انسٹی ٹیوٹ آف میڈیکل ایکسیلنس اپنے پہلے بیچ کے طلباء کے لیے داخلہ کی فہرست کو منسوخ کردے،کیونکہ، ان میں سے 90 فیصد کشمیر سے تعلق رکھنے والے مسلمان ہیں۔اودھم پور سے بی جے پی کے ایم ایل اے، آر ایس پٹھانیہ نے وشو ہندو پریشد (وی ایچ پی) اور بجرنگ دل کے حمایت یافتہ مظاہروں کی حمایت کرتے ہوئے دلیل دی ہے کہ ایک ادارہ جو ویشنو دیوی کو دیے گئے عطیات سے قائم کیا گیا ہے، اس پر مسلم کمیونٹی کا غلبہ نہیں ہونا چاہیے، اور یہ کہ سیٹیں ہندوؤں کے لیے مختص کی جانی چاہیے۔
تاہم، یہ ممکن نہیں ہوگا کیونکہ میڈیکل کالج کو اقلیتی ادارے کے طور پر درجہ بندی نہیں کیا گیا ہے۔ اس کے باوجود وی ایچ پی اور بجرنگ دل نے کٹرا میں واقع انسٹی ٹیوٹ کے باہر مظاہرے کیے اور ویشنو دیوی شرائن بورڈ کے چیف ایگزیکٹیو آفیسر کا پتلا بھی جلایا۔
تنازعہ کیوں اور کیسے شروع ہوا؟
جموں و کشمیر بورڈ آف پروفیشنل انٹرنس ایگزامینیشنز (جے کے بی او پی ای ای) نے وشنو دیوی میڈیکل انسٹی ٹیوٹ کے لیے 50 امیدواروں کی فہرست کو کلیئر کرنے کے بعد یہ تنازعہ شروع ہوا، فہرست میں سے 42 کا تعلق کشمیر اور آٹھ کا جموں سے تھا۔ ان طلباء میں سے 36 پہلے ہی داخلہ لے چکے ہیں۔
وی ایچ پی کے جموں و کشمیر کے صدر راجیش گپتا نے کہا کہ 2025-26 کے داخلوں کو روک دیا جانا چاہیے اور کالج کو یقینی بنانا چاہیے کہ اگلے سال منتخب ہونے والے زیادہ تر طلبہ ہندو ہوں۔ بجرنگ دل کے جے اینڈ کے صدر راکیش بجرنگی نے فہرست کی تیاری میں جے کے بی او پی ای ای کی طرف سے تعصب کا الزام لگایا۔
بجرنگی نے کہا کہ بورڈ کی انتظامیہ کو اس کے بجائے NEET کے تحت داخلہ دیناچاہیے تھا، جس میں پورے ہندوستان سے امیدوار تھے، کیونکہ یہ کالج ملک بھر کے عقیدت مندوں کے عطیات سے قائم کیا گیا تھا۔
’’ہمیں کشمیر کے امیدواروں کے کسی دوسرے میڈیکل کالج میں داخلہ لینے پر کوئی اعتراض نہیں ہے، لیکن ویشنو دیوی کالج میں ہندو امیدواروں کے لیے سیٹیں مختص کی جانی چاہئیں، کیونکہ یہ وشنو دیوی کی عبادت گاہ کے عطیات کے ساتھ قائم کیاگیا ہے۔‘‘
بی جے پی ایم ایل اے پٹھانیہ نے کہا کہ میڈیکل کالج نے حکومت سے ایک پیسہ بھی نہیں لیا اور ویشنو دیوی یاتریوں کے عطیات سے چلتا ہے۔ اس لیے ہندو طلبہ کے لیے نشستیں مختص کی جانی چاہیے کیونکہ یہ مسئلہ یاتریوں کے عقیدے سے جڑا ہوا ہے۔
وشنودیوی کالج کے داخلے
نیشنل کانفرنس کے جموں صوبے کے صدر رتن لال گپتا نے شری ماتا ویشنو دیوی شرائن بورڈ پر الزام لگاتے ہوئے کہا کہ اسے اقلیتی درجہ کے لیے درخواست دینی چاہیے تھی۔ جیسا کہ اس نے ایسا نہیں کیا، JKBOPEE کو NEET میں ان کی طرف سے حاصل کردہ میرٹ کی بنیاد پر طلباء کا انتخاب کرنا پڑا، زیادہ تر طلباء کا تعلق مسلم کمیونٹی سے ہے۔
عہدیداروں نے انڈین ایکسپریس کو بتایا کہ داخلے قائدے کے مطابق تھے، اور نیشنل میڈیکل کونسل (NMC) کے رہنما خطوط کے مطابق ہے،اسکے تحت جموں و کشمیر کے 13 میڈیکل کالجوں میں تمام 1,685 نشستوں پر داخلے NEET کی فہرست کے مطابق کیے جائیں۔ ویشنودیوی کالج میں داخلے دیر سے شروع ہوئے، اور پہلی داخلہ فہرست کونسلنگ کے تیسرے دور کے بعد تیار کی گئی۔
JKBOPEE نے 13 میڈیکل کالجوں کے لیے 5,865 UT- ڈومیسائلڈ امیدواروں کو شارٹ لسٹ کیا اور 2,000 کو کونسلنگ کے لیے مدعو کیا، جن میں سے %70 مسلم کمیونٹی سے تھے۔ دوسری طرف، جموں کے 87 امیدواروں نے کشمیر کے پانچ سرکاری میڈیکل کالجوں میں داخلہ لیا، جن میں سے زیادہ تر ایس سی/ایس ٹی، ای ڈبلیو ایس اور لائن آف کنٹرول اور بین الاقوامی سرحد کے ساتھ والے علاقوں کے رہائشیوں کے لیے مخصوص تھے۔
عہدیداروں نے بتایا کہ یہ طریقہ کار کوئی نیا نہیں ہے کیونکہ جموں خطہ کی 900 نشستوں میں سے زیادہ تر پر پچھلے کچھ سالوں میں کشمیر کے طلباء نے داخلہ لیا ہے۔ انجینئرنگ کی نشستوں کے معاملے میں، ان میں سے زیادہ تر جموں کے طلباء کا قبضہ ہے۔
